Бөлүмдөр
Бейшемби, 22-август
Баракелде, Бишкек 07.03.2019 10:16

Өлкө башчы насыя берүүдө соодага эмес, Улуттук стратегиядагы тармактарга көңүл бурууга чакырат

Президент С.Жээнбеков менен финансы институттарынын башчыларынын жолугушуусу
Президент С.Жээнбеков менен финансы институттарынын башчыларынын жолугушуусу

Turmush -  Президент Сооронбай Жээнбеков 6-мартта Россия-Кыргыз өнүктүрүү Фондунун төрагасы Эркин Асрандиевди, «Кепилдик фонд» ААК төрагасы Малик Абакировду, «Айыл Банк» ААК төрагасы Мурат Акимовду жана «РСК Банк» ААК төрагасы Азизбек Оморкуловду кабыл алды.

Мамлекет башчысы 2019-жылдын 27-28-февралында бийликтин бардык бутактарынын жетекчилери, жергиликтүү бийликтин башчылары, бизнес, жарандык коом жана өнөктөш уюмдардын өкүлдөрү катышкан «Региондорду өнүктүрүү боюнча улуттук диалогу» болуп өтүп, жер-жерлердеги көйгөйлөр талкууланып, катышуучулар тарабынан региондордо финансылык каражаттардын жеткиликтүүлүгү боюнча суроолор көтөрүлгөндүгүн эске салды. Президент региондордогу бизнести, экспортко багытталган ишканаларды колдоону улантыш керектигин белгиледи, деп маалымдайт басма сөз кызматы.

«Ишкерлердин жаңы долбоорлоруна колдоо көрсөтүү, каржылоо, ошол эле маалда аларга туура бизнес алып барууну үйрөтүш керек. Бул жерде финансы-кредиттик мекемелер алдыңкы ролду ойнойт», - деп белгиледи Сооронбай Жээнбеков.

Ошондой эле учурда логистикалык борборлор бардык облустарда ачылбаганын белгилеп, логистикалык борборлорду куруу долбоорлоруна көӊүл бурууну сунуштады. Жакында өндүрүштү жандандыруу боюнча программа иштелип чыгарын, буга байланыштуу өндүрүш ишканаларын каржылоо боюнча сунуштар берилиши зарылдыгын белгиледи.

Президент Сооронбай Жээнбеков насыяны берүүдө соодага эмес, Улуттук стратегияда белгиленген өнөр жай, кайра иштетүү, энергетика, туризм, айыл чарба сыяктуу приоритеттүү тармактарга, кепилдик берүүдө региондорго көбүрөөк көӊүл буруу зарылдыгын белгиледи.

Мындан тышкары, «Региондорду өнүктүрүү жана өлкөнү санариптештирүү» жылынын алкагында насыя алуу маселеси жер-жерлерге санарип технологиялар аркылуу жеткиликтүү, арзан жана кыска убакытта бюрократиясы жок берүүнү камсыздоо керектигин белгиледи.

Аталган финансы институттарынын жетекчилери 2018-жылдын жыйынтыгы, аймактардагы ишкерликти колдоо, жалпысынан мамлекеттеги бизнести өнүктүрүү боюнча аткарылган жумуштар жана аймактардагы долбоорлорду ишке ашыруу боюнча алдыга коюлган пландар тууралуу маалымат беришти.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×